Кочани, 16.12.2025
Во периодот од 1 до 8 декември, во Келн, Германија, четворица младински работници од Македонија преставници на нашата организација беа дел од меѓународниот Erasmus+ тренинг курс „Promoting Inclusive Entrepreneurship for Marginalized Groups“. Иако сите учесници имаа претходно искуство со Erasmus+ проекти, оваа соработка се истакна како едно од највредните и најинтензивни искуства за учење.
Инклузивното и социјалното претприемништво претставуваа ново поле за младинските работници од Македонија, но благодарение на јасно структурираната програма, длабоките дискусии и разновидноста на учесниците, оваа недела се претвори во значајно и трансформативно образовно искуство. Преку работа во меѓународни тимови, учесниците се запознаа со практични алатки како empathy mapping, stakeholder analysis, Theory of Change и модели на социјален бизнис, кои овозможија подлабоко разбирање на комплексните општествени предизвици.
Она што имаше најголема вредност беше сознанието дека истите социјални проблеми се доживуваат различно во зависност од личното потекло, животните искуства и можностите што ги има секој поединец. Оваа интеркултурна размена придонесе кон развој на емпатија, критичко размислување и поинклузивен пристап кон работата со маргинализирани групи.
Најважната порака што младинските работници ја понесоа од овој тренинг беше јасна:
не постои едно универзално решение за сите. Вистинското влијание започнува кога ги разбираме луѓето, ги среќаваме таму каде што се и градиме решенија заедно со нив, а не само за нив.
Четворицата младински работници од Македонија се вратија со нови знаења, перспективи и мотивација кои ќе бидат споделени преку локални активности, работилници и идни Erasmus+ иницијативи. Благодарност до организациите и сите вклучени кои ја направија оваа обука можно и ја поставија Erasmus+ мобилноста како искуство што поставува високи стандарди за сè што следува понатаму.
Ј Ј
